Հասարակական գիտությունների ամբիոնի առաքելությունն է իր գործունեությամբ և դասավանդվող առարկաների միջոցով նպաստել սովորողների աշխարհայացքային պատկերացումների ընդլայնմանը, քննադատական և ստեղծագործական մտածողության ձևավորմանը, դաստիարակել քաղաքացիական գիտակցություն ունեցող օրինապաշտ քաղաքացիներ՝ ուսանողների մոտ ձևավորելով անձնական պատասխանատվություն սեփական պետության և նրա քաղաքացիների հանդեպ, պատրաստ հետամուտ լինելու ժողովրդավարական սկզբունքների իրագործմանը և ազգային ու համամարդկային արժեքների տարածմանը: Այդ նպատակով ամբիոնի բանիմաց, փորձառու մասնագետների կողմից շարունակական աշխատանքներ են իրականացվում առարկայական ծրագրերի արդիականացման, դասախոսությունների տեքստերի թարմացման, ուսանողակենտրոն կրթական մեթոդների կատարելագործման ուղղությամբ:

Ամբիոնի դասախոսներն իրականացնում են գիտահետազոտական աշխատանքներ, հրատարակում մենագրություններ ու գիտական հոդվածներ: Մասնավորապես Հ. Կ. Սուքիասյանը մենագրություններ է հրատարակել Խորհրդային Հայաստանի դիվանագիտական կապերի, տարածքային-սահմանային խնդիրների, երգիծական մամուլի պատմության, Երևան քաղաքի ընդարձակման, Գ. Վ. Վարդանյանը՝ Հայաստանի առաջին Հանրապետության (1918-1920 թթ.) մշակութային կյանքի,  Ա. Ա. Խուդավերդյանը՝ Մելքիսեդեկ արքեպիսկոպոս Մուրադյանցի խմբագրական և հրապարակախոսական գործունեության վերաբերյալ: Մ.Նաջարյանը տպագրել է մենագրություն՝ նվիրված Հայաստանի Երրորդ Հանրապետության անկախացմանը հաջորդող 25 տարիներին հայ-թուրքական հարաբերությունների հաստատման վրա ինչպես Հայոց ցաղասպանության միջազգային ճանաչման և դատապարտման գործընթացի, այնպես էլ տնտեսական գործոնի ու Արցախի հիմնախնդրի ազդեցության քննությանը, ինչպես նաև Հայոց ցեղասպանության ժխտողականության հարցում տարբեր ժամանակափուլերում թուրքական իշխանությունների որդեգրած մարտավարության փոփոխությանը:Ամբիոնի դասախոսները տեղական և միջազգային գիտաժողովներում հանդես են եկել զեկուցումներով, հրատարակել ուսումնամեթոդական աշխատանքներ, մասնակցել վերապատրաստումների:

Ամբիոնի դասախոսները շարունակաբար օգնում են ուսանողներին՝ ուսանողական գիտաժողովներում տարբեր թեմաներով գիտական զեկուցումներ պատրաստելու և ներկայացնելու համար: