Ագրոբիզնեսի և տնտեսագիտության ֆակուլտետն Ագրարային էկոնոմիկայի, Ագրոբիզնեսի կառավարման և քաղաքականության, Ֆինանսահաշվային, Տվյալագիտության և Հասարակական գիտությունների մասնագիտական ամբիոնների հետ համատեղ պատրաստում է ագրոպարենային համակարգի և այլ ոլորտների բարձր որակավորում ունեցող տնտեսագիտության բակալավրեր, տնտեսագիտության մագիստրոսներ, իսկ ասպիրանտուրայում՝ տնտեսագիտության թեկնածուներ:
Ֆակուլտետի դեկանատն իրականացնում է ուսումնական գործընթացի կազմակերպման աշխատանքներ 13 մասնագիտությունների ուղղությամբ բակալավրիատում, մագիստրատուրայում և ասպիրանտուրայում:
Ֆակուլտետի բակալավրիատի առկա ուսուցման համակարգում սովորում է 350 ուսանող, մագիստրատուրայի առկա և հեռակա ուսուցման համակարգերում՝ 105 մագիստրանտ, ասպիրանտուրայում՝ 25 ասպիրանտ և հայցորդ: Ընդհանուր թվաքանակը կազմում է 480:
2020/2021 ուսումնական տարվանից դիմորդների ընդունելությունը կազմակերպվում է տնտեսագիտական մասնագիտությունների երկու ուղղությամբ՝ «Ագրոէկոնոմիկա» ու «Ագրոբիզնես և ֆինանսներ»: Ուսուցման տարիներին ապագա մասնագետները կուսումնասիրեն ժամանակակից առարկաներ, կանցնեն մեկ աշխատանքային կիսամյակ մասնագիտական հմտություններ ձեռք բերելու համար, կներգրավվեն ուսանողական գիտական ընկերության խմբակներում, կմասնակցեն համալսարանական և միջազգային ուսանողական գիտաժողովներին, իսկ բակալավրիատն ավարտելու պահին լիովին կլինեն մրցունակ աշխատաշուկայում՝ զբաղեցնելով պատասխանատու պաշտոններ հանրապետության ագրոպարենային համակարգի տնտեսվարող սուբյեկտներում, ազգային տնտեսության տարբեր կազմակերպություններում, բանկային և հարկային համակարգերում:
Իսկ մագիստրատուրայում կշարունակվի տեսական ու գործնական գիտելիքների յուրացումը և մագիստրանտների ներգրավվածությունը գիտական և գիտահետազոտական աշխատանքներում: Մագիստրատուրան ավարտողներից շատերն անցնում են գիտամանկավարժական արդյունավետ գործունեության, նրանց մեծ մասն աշխատում և դասավանդում է Ագրարային համալսարանում: Ֆակուլտետի շրջանակներում շուրջ 20 տարի արդյունավետ իրագործվում է «Ագրարային մենեջմենթ» գերմանական մագիստրոսական միջազգային ծրագիրը, որը հնարավորություն է ընձեռում ստանալ երկակի դիպլոմներ Հայաստանի ազգային ագրարային համալսարանի և Գերմանիայի Դաշնային Հանրապետության Վայենշտեֆան-Թրիսդորֆ համալսարանի կողմից:
Ֆակուլտետը պարբերաբար կազմակերպում է բաց դասեր արտադրության ներկայացուցիչների, ոլորտի ճանաչված գիտնականների, արտասահմանցի գործընկերների հետ: Բազմաբովանդակ են միջազգային համագործակցության կապերն արտասահմանյան համալսարանների հետ: Ֆակուլտետի դասախոսներն ու ուսանողները պարբերաբար զեկուցումներով հանդես են գալիս տարբեր համալսարաններում կազմակերպվող միջոցառումներին, գիտաժողովներին, սեմինարներին, քննարկումներին և հեռուստակամուրջներին:
Ագրոբիզնեսի և տնտեսագիտության ֆակուլտետն իրականացնում է իր դիրքերի ամրապնդմանը, արտաքին գրավչության ապահովմանը, բարձրագույն կրթության ոլորտում մրցունակության բարձրացմանը և գերակա բոլոր ուղղություններով բարձր ցուցանիշների ձեռքբերմանը միտված քաղաքականություն: