ՀԱԱՀ ռեկտորի 2022 թվականի դեկտեմբերի 5-ի հրամանով համալսարանի Ջրային ռեսուրսների կառավարման  ու Հողաշինարարության և հողային կադաստրի ամբիոնների միավորմամբ ստեղծվեց Ջրային  և հողային ռեսուրսների կառավարման ամբիոնը, որը ստեղծման օրից ղեկավարում է գյուղ․գիտ․դոկտոր, պրոֆեսոր Գուրգեն Եղիազարյանը։

Ջրային և հողային ռեսուրսների կառավարման ամբիոնը ջրային և հողային ռեսուրսների կառավարման ոլորտի բարձրորակ մասնագետներ է պատրաստում ոռոգման, ջրամբարաշինության, ջրամատակարարման, մելիորատիվ համակարգերի նախագծման, կառուցման, շահագործման, հողաշինարարությանը, հողաշինարարական նախագծմանը, գյուղատնտեսական հողատեսքերի արդյունավետ օգտագործման, հողերի հաշվառման, չափագրման, խոշորացման և միավորման, կադաստրային գնահատման նոր մեթոդների մշակման բնագավառներում կիրառական ու գիտագործնական խնդիրների լուծման համար։ Ամբիոնում դասավանդում են գիտաարտադրական հարուստ փորձ ունեցող բարձրորակ մասնագետներ, որոնք   ամբիոնին կից հիդրավլիկայի, հիդրոտեխնիկական կառուցվածքների, ջրամատակարարման, պոմպակայանների,մելիորացիայի լաբորատորիաներում, GIS,RS ուսումնական կաբինետներում, ջրային և հողային ռեսուրսների կառավարման հետազոտական տեխնոլոգիական կենտրոնում արդյունավետ զուգակցում են տեսական դասաժամերը գործնական և լաբորատոր պարապմունքների, արտադրությունում կազմակերպված բաց դասերի,  պրակտիկաների և աշխատանքային կիսամյակի հետ։ Ոսանողների համար հաճախ կազմակերպվում են արտադրության լավագույն մասնագետների բաց դասախոսություններ, աշխատաիցների համար արտադրությունում վերապատրաստումներ և քննարկումներ արտադրության և կրթության կապի ամրապնդման, առկա խնդիրների բացահայտման և ուսման որակի բարելավման նպատակով: Ամբիոնի դասախոսները պարբերաբար տարբեր միջազգային ծրագրերով վերապատրաստումներ են անցնում արտերկրի համալսարաններում, ձեռք բերած փորձը կիրառում ուսումնական և հետազոտական աշխատանքներում:
Հատկապես կարևորվում են թվային տեխնոլոգիաների ներդրմամբ ուսումնական գործընթացի կազմակերպման աշխատանքները, որի շրջանակներում 6 դասախոսներ վերապատրաստվել են Arc GIS, RS, AgisoftMetaship ծրագրերով։ Արդյունքում ձեռք բերված հմտությունները հատկապես կիրառվում են բակալավրիատում և մագիստրատուրայում ստեղծված նոր «Հողային և ջրային ռեսուրսների ճարտարագիտություն»  մասնագիտության ուսումնական պլանում առկա  առարկաները պատշաճ մակարդակով և արդի ձևաչափով մատուցելու նպատակով: Նորարարություն է ուսանողների ներգրավվածությունը հետազոտական աշխատանքներում․ այս նպատակով համալսարանի ֆինանսավորմամբ համակողմանի հետազոտական աշխատանքներ է իրականացնում  ամբիոնին կից գործող Ջրային և հողային ռեսուրսների կառավարման տեխնոլոգիական հետազոտական կենտրոնը: Համալսարանի անօդաչու թռչող սարքերի լաբորատորիան լայն հնարավորություն է ստեղծում թվային և ճշգրիտ գյուղատնտեսության ոլորտում իրականացնելու նախագծահետախուզական և գիտահետազոտական  աշխատանքներ: Ամբիոնի կողմից  ջրային և հողային ռեսուրսների կառավարման ոլորտում ևս իրականացվում են գիտահետազոտական աշխատանքներ։ Արդյունքում գիտության թեկնածուի  գիտական աստիճան են ստացել 17 դասախոսներ և ասիստենտներ։ Պրոֆեսորադասախոսական կազմի մասնագիտական կրթական որակները թույլ են տալիս մասնագիտական խորացված դասախոսություններ վարել արտերկրի համալսարաններում, որի համար ամբիոնը մասնակցության առաջարկություն է ներկայացրել համալսարանի Միջազգային կապերի դեպարտամենտ։ Ամբիոնի աշխատակիցները մասնակցում են երկարաժամկետ միջազգային ծրագրերին, որի իրականացման գործում  ներգրավվում են նաև ուսանողները, մագիստրանտներն ու ասպիրանտները: Ակնկալվում է, որ իրականացվող նորարարական աշխատանքների արդյունքում ջրային և հողային ռեսուրսների կառավարման ոլորտի ապագա մասնագետների ստացած ագրոճարտարագիտական կարողություններն ու հմտությունները թույլ կտան հանրապետության ջրային և հողային ռեսուրսների արդյունավետության բարձրացման ուղղություններով հանդես գալու կրեատիվ տեխնոլոգիական լուծումներով: