ՀԱԱՀ ռեկտորի՝ 2023 թվականի հոկտեմբերի 20-ի թիվ 956 հրամանով (հիմք՝ համալսարանի Հոգաբարձուների խորհրդի և Գիտական խորհրդի համապատասխան որոշումները) Գյուղատնտեսական մեքենաշինության, ավտոմատացման և տեխնիկայի շահագործման ու Կենսագործունեության անվտանգության ամբիոնների միավորման արդյունքում ստեղծվել է Մեքենասարքավորումների ճարտարագիտության և տեխնիկական անվտանգության ամբիոնը։
Վերոնշյալ երկու ամբիոններում էլ դասախոսների կողմից տարիներ շարունակ գիտամանկավարժական գործունեությանը զուգահեռ կատարվել են գիտահետազոտական աշխատանքներ: Ամբիոնի գիտնականների կողմից աշխատանքներ են տարվել տեխնոլոգիաների ու փոքրաչափ մեքենաների մշակման ուղղությամբ․ մշակվել և արտադրությունում ներդրել են գոմաղբի աերոբային և անաերոբային մշակման և կենսահումուսի արտադրության նոր տեխնոլոգիաներ և մեքենասարքավորումներ, խտացրած, կոպիտ, հյութալի կերերի մանրիչ մեքենաներ, շարժական կթի ագրեգատ և այլն:
Ամբիոնում կատարվող գիտահետազոտական աշխատանքներն ուղղված են նաև գյուղատնտեսության էլեկտրիֆիկացման հիմնական ուղղություններից մեկին` ՀՀ գյուղատնտեսական արտադրության ոլորտում արևային և այլընտրանքային էներգոաղբյուների ներդրմամբ, ինչպես նաև հետազոտություններ են իրականացվում մետաղահատ հաստոցների համակարգում կտրման դինամիկական գործընթացների վերաբերյալ։
Որոշակի աշխատանքներ են կատարվել փոքրաչափ կերամանրիչների մշակման և պարամետրերի հիմնավորման ուղղությամբ: Ամբիոնի դասախոսները ստացել են մոտ 100 գյուտերի հեղինակային վկայականներ ու պատենտներ, մի քանի գյուտեր պատենտավորվել են Կանադայում, Ֆրանսիայում, Գերմանիայում։
Ամբիոնում գործում են ուսումնական անհրաժեշտ արհեստանոցները՝ մետաղների կտրման, նյութագիտության, համափոխարինելիության և տեխնիկական չափումների լաբորատորիաները, որոնք հագեցած են համապատասխան տեխնիկական միջոցներով, սակայն դեռևս համալրման կարիք ունեն։
Կենսագործունեության անվտանգության ոլորտում ամբիոնում իրականացվում են ուսումնամեթոդական, գիտահետազոտական աշխատանքներ՝ հետևյալ ուղղություններով` ռադիոակտիվ աղտոտված հողերում գյուղատնտեսական արտադրության վարման տեխնոլոգիաների կատարելագործում, կերատեսակների քիմիական կոնսերվացում և ծղոտի քիմիացում, հատիկային կերատեսակների մանրիչների կատարելագործում, տրանսպորտային էկոլոգիայի և երթևեկության էկոլոգիական անվտանգության բարձրացման մեթոդների մշակում, Էներգիայի այլընտրանքային աղբյուրների արդյունավետ օգտագործման և հանրապետությունում արտակարգ իրավիճակներում բնակչության անվտանգության ապահովման մեթոդների կատարելագործում:
Ուսումնաարտադրական պրակտիկաները կազմակերպելիս ամբիոնը համագործակցում է «ԳարիԳրուպ» ՍՊԸ-ի, «ԻԿՕ Մաշիների» ՍՊԸ/կամացու, «Ցեպելին»-ի, «Ար-Բե» ՍՊԸ-ի, «Նաիրի Բերրիություն» ՍՊԸ-ի, «ՄԷԿ» ՎԲԸ-ի, «SHTIGEN», «ՀԷՑ» ՓԲԸ-ի հետ և այլն:
Ուսումնամեթոդական և գիտական աշխատանքների բնագավառում ամբիոնը համագործակցում է նաև Հայաստանի ազգային պոլիտեխնիկական համալսարանի կենսագործունեության անվտանգության ամբիոնի, ինչպես նաև Ճգնաժամային կառավարման պետական ակադեմիայի հետ: