ՀԱԱՀ ռեկտորի՝ 2023 թվականի հոկտեմբերի 20-ի թիվ 955 հրամանի համաձայն (հիմք՝ համալսարանի Գիտական խորհրդի և Հոգաբարձուների խորհրդի նիստերի համապատասխան որոշումները) Թերապիայի, վիրաբուժության և ծննդագիտության ու Համաճարակաբանության և մակաբուծաբանության ամբիոնները միավորվել են՝ կազմելով նոր՝ Անասնաբուժության ամբիոնը։
Նախկին երկու ամբիոններն էլ հսկայածավալ աշխատանքներ են կատարել ագրարային ոլորտի համար անհրաժեշտ մասնագետների պատրաստման գործում։
Թերապիայի, վիրաբուժության և ծննդագիտության նախկին ամբիոնում 1996 թվից գործում են արհեստական սերմնավորող-գինեկոլոգների պատրաստման դասընթացներ: «Անասնաբուժություն», «Անասնաբուժական սանիտարական փորձաքննություն» և «Գյուղկենդանիների սելեկցիա, գենետիկա և կենսատեխնոլոգիաներ» մասնագիտություններով սովորող ուսանողներն այս դասընթացն ավարտելուց հետո հանձնում են քննություն և ստանում «Արհեստական սերմնավորող-օպերատորի» որակավորում:
Կատարվող գիտական հետազոտությունները նպատակաուղղված են պաշտպան համակարգերի վրա հակաբիոտիկների ազդեցության ուսումնասիրմանը, գյուղատնտեսական կենդանիների և թռչունների մարսողական, շնչառական, միզային համակարգերի, նյութափոխանակության խանգարումների և հիվանդությունների ախտորոշմանը, բուժմանը, կանխարգելմանն ու նորագույն մեթոդների կատարելագործմանը, ինչպես նաև կենդանիների անզգայացման, ամորձատման արդյունավետ մշակմանը և ներդրմանը, կենդանիների կերային տրավմատիզմի մագնիսական միջոցներով կանխարգելմանը և բուժմանը, ախտահարված վերքերի բուժման նորագույն արդյունավետ եղանակների մշակմանը և կիրառմանը:
Իսկ արդեն նախկին Համաճարակաբանության և մակաբուծաբանության ամբիոնում ուսումնամեթոդական աշխատանքները կազմակերպվել են ժամանակի պահանջներին համապատասխան: Լաբորատոր-գործնական պարապմունքների արդյունավետության բարձրացման նպատակով ամբիոնը համագործակցում է հանրապետության ֆերմերային տնտեսությունների, Անասնաբուժասանիտարական և ֆիտոսանիտարական լաբորատոր ծառայությունների հանրապետական կենտրոնի, Երևանի կենդանաբանական այգու և կենդանասեր անհատների հետ։ Լաբորատոր պարապմունքներն անցկացվում են մանրէաբանական և մակաբուծաբանական հետազոտությունների համար անհրաժեշտ սարքավորումներով հագեցված լաբորատորիաներում:
Ամբիոնին կից գործում է կենդանիների ինֆեկցիոն հիվանդությունների և մակաբուծաբանական լաբորատորիան, որն օգտագործվում է ինչպես գիտահետազոտական աշխատանքների, այնպես էլ ուսումնական գործընթացի ապահովման նպատակով։ Ամբիոնն ունի հարուստ մակաբուծական և անասնաբուժական կենսապատրաստուկների թանգարան-լսարաններ: 2020 թվականին ամբիոնի աշխատակիցների անմիջական մասնակցությամբ մշակվել են «Համայնքային վակցինատորների» մոդուլային ուսումնական ծրագիր, «Անասնաբուժություն» ոլորտային շրջանակի (որակավորումների) բնութագրեր, «Ռազմական դրության պայմաններում և արտակարգ իրավիճակներում անասնաբուժական գործունեության կազմակերպման ուղեցույց» փաստաթղթերը:
Ամբիոնի աշխատակիցները համագործակցում են Մոսկվայի, Սալոնիկի, Նյու Յորքի, Բարսելոնայի և այլ համալսարանների համապատասխան ամբիոնների և միջազգային կազմակերպությունների հետ: