Արտադրական պրակտիկա. Շատ խիտ տեղեկատվությամբ հագեցած օր

Հողաշինարարություն եւ հողային կադաստր մասնագիտության երրորդ եւ չորրորդ կուրսերի ուսանողները, ամբիոնի վարիչի պարտականությունները կատարող, գ.գ.դ., պրոֆեսոր Գուրգեն Եղիազարյանի գլխավորությամբ, արտադրական պրակտիկայի շրջանակում այցելել էին Արագածոտնի մարզի համանուն համայնք: Նպատակն էր տեսնել՝ այստեղ տեղակայված արեւային կայանների կառուցման գեոդեզիական ապահովման աշխատանքները:

Պրակտիկան վարել են հիշյալ ամբիոնի աշխատակիցներ՝ տեխնիկական գիտությունների թեկնածու Դավիթ Սողոմոնյանը եւ Արայիկ Հակոբյանը, որոնք դաշտային աշխատանքների ահռելի փորձ-փորձառություն ունեն: Իսկ դա նշանակում է, որ պրակտիկայի օրը շատ արդյունավետ, «գիտելիքառատ», հետաքրքիր, հագեցած է եղել:

– Ամբիոնից մեզ հետ տարել էինք էլեկտրական տախեոմետր, GPS Rover: Պրակտիկայի ղեկավարները ակնառու ներկայացրեցին հողաշինարարական աշխատանքների գեոդեզիական ապահովման բովանդակությունը, ապա՝ համակարգչային ծրագրերը, որոնցով մուտքագրվում են տվյալները,- պատմում է պրոֆեսոր Գուրգեն Եղիազարյանը:

Ուսանողներն իրականացրել են երկու բնույթի դաշտային չափում՝ հանույթագրում եւ նշագրում: Այնուհետեւ սովորել են չափումների արդյունքները համակարգիչ ներմուծելու հաջորդականությունը:

– Ուսանողների համար անչափ հետաքրքիր էր,- ասում է ամբիոնի վարիչը,- Համատեղ աշխատելու շատ լավ, օրինակելի մոդել էր սա: Եւ պետք է ջանանք, որ մյուս առարկաների տեսական ու գործնական գիտելիք-հմտությունների սերմանումն այսպես միահյուսված ու արդյունավետ լինի: