Ուսումնական գործընթաց. դեկանները միշտ իրենց տեղում եւ հասանելի են՝ առկա, թե առցանց

Ագրոբիզնեսի եւ տնտեսագիտության ֆակուլտետի դեկան, տ.գ.դ., պրոֆեսոր Էդուարդ Ղազարյանի հետ զրույցը երբեք չի կարող տեւական ու առանց ընդհատումների լինել: Անվերջանալի հարցերով, խորհրդակցելու խնդրանքով դիմում են գործընկերները, ուսանողները, շրջանավարտները, անգամ ծնողները: Եւ նա հանգիստ, պատրաստակամորեն, հանգամանորեն պատասխանում, հստակեցնում է բոլոր խնդիրներ:

Այսօր մեր զրույցը դարձյալ ընդհատվեց՝ երկրորդ կուրսեցիները Zoom հարթակում հանդիպման էին հրավիրել դեկանին: Նրանց հուզում էին շրջափոխման արդյունքները, միջանկյալ քննություններ լինել-չլինելու, լինելու դեպքում ձեւաչափի հարցերը: Պրոֆեսոր Ղազարյանը համբերատար պատասխանում էր բոլոր հարցերին: Ասում է, որ միջանկյալիների ձեւաչափը՝ թեստ, թե քննատոմս, կարող են համատեղ քննարկել եւ ընտրել:

– Բայց մենք, իրավիճակի հետ կապված, հակված չենք միջանկյալներ հանձնելու,- տրտնջում է ուսանողուհին:

Դեկանը հիմա էլ մանրամասն բացատրում է, որ միջանկյալ քննությունները հօգուտ ուսանողի են իրականացնում, եւ լավ հնարավորություն են ընդգրկուն առարկաները մաս առ մաս յուրացնել-հանձնելու: Ինչ մնում է իրավիճակին… «Պետք է ոգով ամուր լինենք բոլորս, կոտրվելու, անկումային տրամադրության մեջ ընկնելու իրավունք չունենք: Ռազմադաշտում կռվող զինվորը պետք է համոզված լինի, որ թիկունքը ամուր է, անկոտրում»,- քաջալերում է դեկանը եւ ուսանողների տրամադրությունը ակնհայտորեն փոխվում, թուխպը ցրվում է:

Ուսանողները ունեն իրենց մտահոգությունները, խնդիրները լսող-հասկացող-հասանելի դեկան, եւ սա է մեր համալսարանի սովորական գործելակերպը: