Մարտի 28-ին կայացավ ռեկտորատի հերթական նիստը՝ ռեկտորի պարտականությունները կատարող, նորընտիր ռեկտոր Հրաչյա Զաքոյանի նախագահությամբ։
Օրակարգի առաջին հարցով քննարկվեցին եւ հաստատվեցին վճարովի համակարգում սովորող ուսանողների վարձավճարների զեղչերը։ Մասնավորապես, որոշում կայացվեց տարբեր կատեգորիաների 133 ուսանողի տրամադրել 20 տոկոսի զեղչ, որից 99-ին՝ բարձր առաջադիմության համար։ Արցախից բռնի տեղահանվածներին կտրամադրվի 50 տոկոսի զեղչ։
Օրակարգային էր ՀԱԱՀ ռազմավարական գործողությունների պլանի եւ հաստատութենական հավատարմագրման համատեքստում հաստատված «Փորձագիտական զեկույցում նշված թերությունների վերացման ծրագրի» քննարկումը, որի վերաբերյալ զեկուցումով հանդես եկավ Որակի գնահատման եւ ապահովման կենտրոնի տնօրեն Աննա Դաշտոյանը։ Ներկայացվեցին հիմնական ցուցանիշները, որ, չնայած թերություններին, ընդհանուր առմամբ, բավարար աշխատանքային ռիթմ են թելադրում։ Դրական զարգացումներից է մասնագիտությունների կրթական ծրագրերի կազմման աշխատանքներում ֆակուլտետներին կից արդյունաբերական խորհուրդների գործուն մասնակցությունը։ Ընդլայնվում է ուսանողների ներգրավվածությունը, ընդ որում նաեւ՝ մշտադիտարկումների հարցում։ Տիկին Դաշտոյանը շեշտեց ներքին վերլուծության իրականացացման գործում հստակ չափանիշներով առաջնորդվելու անհրաժեշտությունը, որը թույլ կտա ավելի վստահ անցնել արտաքին գնահատման ու ծրագրային հավատարմագրման գործընթացները։
Աշխատանքային կիսամյակների անցկացման առնչությամբ գործատուների հետ հետադարձ կապի մասին հարցի քննարկման ժամանակ ի հայտ եկան թերություններ։ Որքան էլ դրանք, ընդհանուր առմամբ, չեն նսեմացնում մեր համալսարանի՝ առայժմ «մենաշնորհը» հանդիսացող այս նորարարական գործելակերպի հաջողությունը, այնուամենայնիվ, արժանացան թե հարցով զեկուցող ՈԳԱ կենտրոնի տնօրենի, թե դեկանների եւ թե, հատկապես, նորընտիր ռեկտորի սկզբունքային գնահատականին։ Ոչ բոլոր գործատուներն են պատկերացնում կամ լուրջ վերաբերվում կիսամյակի արդյունավետ իրականացման հարցում իրենց կարեւորագույն դերին, որի վկայությունն են, մասնավորապես, ուսանողներին տրվող չարդարացված բարձր գնահատականները։
Որոշվեց շարունակել սերտորեն աշխատել գործատուների հետ՝ եւս մեկ անգամ բացատրելով իրենց վերապահված պատասխաատու դերը (աշխատանքային կիսամյակի ընդհանուր գնահատականի մեջ գերակա նշանակություն ունի հենց գործատուի գնահատականը)։ Կան գործատուներ, սակայն, որոնց հետ այլեւս նպատակահարմար չէ գործակցությունը շարունակելը։ Իսկ լավ եւ նույնիսկ լավագույն օրինակներ շատ ունենք թե ֆակուլտետներում եւ թե քոլեջի դուալ համակարգում։ Պարոն Զաքոյանի առաջարկությամբ, համապատասխան վերլուծություն կկատարվի եւ ըստ այդմ կորոշվի՝ որ գործատուների հետ է աննպատակահարմար շարունակել աշխատանքը (մանավանդ, որ Ագրարայինի հետ համագործակցելու ձգտում ունեցող ընկերությունների պակաս այսօր չունենք)։ Նորընտիր ռեկտորն առաջարկեց գործատուների հետ աշխատանքի հաջողված փորձը տարածել մյուսների շրջանում, իսկ համալսարանի 95-ամյակի շրջանակում խրախուսման ներկայացնել ֆակուլտետների հետ աշխատող առավել բարեխիղճ գործատուներին։
Քննարկվեց նաեւ քոլեջի, առկա ուսուցման բակալավրիատի, մագիստրատուրայի ավարտական կուրսերի ավարտական աշխատանքների/մագիստրոսական թեզերի կատարման ընթացքին եւ խնդիրներին վերաբերող հարցը։ Եւս մեկ անգամ շեշտադրվեց, որ ավարտական աշխատանքների հանձնման ժամկետները յուրաժամանակությունը ոչ մի կոնկրետ դեպքում չպետք է հանգեցնի որակի ձախողման։