Այսօր՝ նոյեմբերի 12-ին, հյուրընկալել էինք Գյումրու թիվ մեկ եւ Ախուրյանի ավագ դպրոցների 11-րդ դասարանցիներին քիմիայի ուսուցչուհու՝ Սյուզաննա Սուլթանյանի առաջնորդությամբ: Կենսաբանական ուղղվածության հոսքերի աշակերտները, որպես նախագծային աշխատանք, որոշել են խաղողի գինի պատրաստել:
– Մեր Գյումրու բակերում աճող սեւ, մանրահատիկ խաղողից,- ավելի մանրամասնում է տիկին Սուլթանյանը:
Ուսուցիչ-աշակերտներ շատ հետաքրքրասեր համախումբ֊ թիմը սկզբում առաջնորդվել է համացանցային տեսահոլովակ-ռիլերով: Բայց հիմա որոշել են դիմել մասնագետների անմիջական օգնությանը։
– Այսքան տարի կրթության ոլորտում եմ, բայց չգիտեի Ագրարայինի լայն հնարավորությունների մասին: Հիմա զարմացած եւ հիացած եմ,- ասում է ուսուցչուհին՝ գինեդրանը, գինու, քիմիայի լաբորատորիաները, գործնական հմտություններ սերմանելուն-կարողությունները լավարկելուն միտված ամուր գործիքակազմը տեսնելուց հետո:
Ակնհայտ էր, որ պատանիներն էլ խոր գիտելիքներ ունեն քիմիայից եւ հետաքրքրված էին:
