Ֆակուլտետներին կից գործող Արդյունաբերական խորհուրդների ստեղծման (ստեղծվել են համալսարանի ռեկտոր Վարդան Ուռուտյանի հրամանով) հիմնական նպատակը ոլորտի փորձագետների և ՀԱԱՀ համապատասխան ֆակուլտետների միջև երկխոսության ամրապնդման միջոցով ագրարային կրթության համապատասխան ուղղության մրցունակության բարձրացումն է:
Արդյունաբերական խորհուրդների առաքելությունն է կրթություն-մասնավոր հատված երկխոսության համար ծառայել որպես ուրույն հարթակ` արդիականացնելու գյուղատնտեսության համապատասխան ոլորտների կրթական ծրագրերը, նպաստելու ուսանողների գործնական հմտությունների զարգացմանը և պատրաստելու առավել մրցունակ կադրեր ոլորտի կազմակերպությունների համար։
Խորհուրդն իր աշխատանքները կազմակերպում է նիստերի միջոցով, որոնք գումարվում են առնվազն եռամսյակային կտրվածքով, ինչպես նաև արտահերթ նիստերի միջոցով` աշխատակարգին համապատասխան:
Խորհուրդների նիստերը հրավիրում և համակարգում են համապատասխան ֆակուլտետների դեկանները։
Խորհուրդների որոշումներն ընդունվում են քննարկումների և կողմերի միջև փոխհամաձայնության հաստատման սկզբունքով, իսկ համաձայնության չգալու դեպքում՝ ձայների երկու երրորդի հարաբերակցությամբ:
Յուրաքանչյուր խորհուրդ գործում է համապատասխան ֆակուլտետին կից, համակարգվում է ֆակուլտետի դեկանի կողմից և իր գործունեությունը ծավալում է՝ համաձայն համալսարանի և Արդյունաբերական խորհուրդների միջև կնքված Փոխըմբռնման հուշագրի: