Նախորդ տարիներից բուսական ծագման մթերքի և հումքի վերամշակման տեխնոլոգիաների բաժնի առջև ծառացած են մի շարք խնդիրներ․ մասնավորապես, խնձորակաթնաթթվային խմորման ընթացքի վրա տարբեր գործոնների ազդեցության ուսումնասիրումը, խնձորակաթնաթթվային խմորման սպոնտայի հավանականությունը և այն կաթնաթթվային բակտերիաների մաքուր կուլտուրայով տանելու պայմանները, խնձորակաթնաթթվային խմորման ձևից և ընթացքից կախված` գինենյութերի ֆիզիկաքիմիական մի շարք ցուցանիշների փոփոխությունը: Նախորդ տարիների գիտական թեմաների կատարման արդյունքում մշակվել են մի շարք սարքավորումներ ու տեխնոլոգիաներ, մասնավորապես`

• հացի և հացաբուլկեղենի նոր տեխնոլոգիաներ և արտադրական բաղադրագրեր,
• հրուշակեղենի նոր տեխնոլոգիաներ, նախատեսված ազգաբնակչության տարբեր խմբերի համար,
• ֆունկցիոնալ նշանակության հացաբուլկեղենի նոր տեխնոլոգիաներ,
• պահածոյացված ձիթապտղի չափարկման և ծակոտման տեղակայանք,
• կոլերների շշերի ստուգման կիսաավտոմատ,
• պահածոյատուփերի վակուում մակափակման տեղակայանք,
• բանջարեղենի տապակման փոքրածավալ տեղակայանք,
• մրգակորիզների վերամշակման սարքավորումների համալիր,
• բանջարեղենի խորովման կարուսելային ավտոմատ,
• խաղողի միջվազային տարածության մշակության մեքենա,
• խաղողի սերմերից բուսական յուղի ստացման հոսքագիծ,
• սննդարտադրության թափոնների բրիկետավորման տեղակայանք,
• պտղաբանջարեղենի համակցված չորացման տեղակայանք,
• ծխախոտի խոնավացման տեղակայանք,
• հայկական վերմուտ գինու տեխնոլոգիա,
• հատիկասպիրտային տակուցքի օգտահանման (վերամշակման) հոսքագիծ,
• մրգակորիզների բուսայուղերի արտադրության հոսքագիծ:

Վերը նշված աշխատանքների մի մասն ավարտվել է հաջողությամբ  և ներդրվել է արտադրությունում, իսկ որոշ աշխատանքներ շարունակվում են:

Ներկայումս բաժնում իրականացվող նորարարական ծրագրերի հիմքում հաշվի են առնվում սննդարտադրության այսօրվա գլխավոր պահանջներն ու մրցակցային առավելությունները՝

• Արտադրանքի որակի բարձրացում
• Սննդամթերքի անվտանգություն
• Սննդային արժեքի բարձրացում՝ հաշվի առնելով տարածաշրջանի պահանջարկը
• Մթերքի որակի երաշխիք
• Այլընտրանքային հումքատեսակների վերամշակման հնարավորություն:

Բաժնում իրականացված հետազոտական աշխատանքները պարբերաբար զեկուցվում են տեղական և միջազգային հեղինակավոր գիտաժողովներում (Լեհաստան, Բուլղարիա, Իտալիա, Մոսկվա և այլն)։

Վերջին տարիներին բաժնի աշխատակիցների կողմից հրատարակվել են 40-ից ավել գիտական աշխատություններ, այդ թվում` հոդվածներ, մեթոդական ցուցումներ, ուսումնական ձեռնարկներ, ստացվել են գյուտերի և օգտակար մոդելների արտոնագրեր:

Բաժինը համագործակցում է արտադրողների և ոլորտի շահագրգիռ կազմակերպությունների հետ։ Իրականացնում է խորհրդատվություն արտադրող և վերամշակող ձեռնարկությունների աշխատակիցների համար՝ նրանց տրամադրելով խորհրդատվական նյութեր ժամանակակից տեխնոլոգիայի և տեխնիկայի, սննդամթերքի անվտանգության, փորձաքննության վերաբերյալ:

Բաժինը մշտապես աջակցում է ուսանողներին, մագիստրանտներին և ասպիրանտներին՝ իրենց գիտական հետազոտությունների հիմքում դնելու նոր ու արդիական գաղափարներ։