Ագրարային համալսարանի թիմն այսօր հաղթանակ տոնեց «Դասախոսական գավաթ 2022» միջբուհական մարզական խաղերի վոլեյբոլի եզրափակիչում ուժեղ մրցակցի՝ Հայաստանի ազգային պոլիտեխնիկական համալսարանի ուժեղ թիմի հետաքրքիր, գրավիչ մրցապայքարում:
«Առաջին սեթում զիջելով մրցակցին, մենք այդուհանդերձ զգում էինք, որ պետք է եւ կարող ենք բեկել խաղի ընթացքը՝ մրցակցին փորձելով թելադրել մեʹր «ձեռագիրը», տեմպը»,- ասում է ՀԱԱՀ Ֆիզիկական կուլտուրայի ամբիոնի վարիչի պաշտոնակատար Հայկ Կիրակոսյանը, որ թիմի մյուս անդամների նման իրեն լավագույնս դրսեւորեց խաղահրապարակում: Ի դեպ, մրցաշարի լավագույն խաղացող ճանաչվեց մեր թիմից Մաքսիմ Մելքոնյանը: Փայլուն խաղով հաղթելով երկու սեթում, Ագրարայինը բաղձալի գավաթը բերեց մեր համալսարան։
Եզրափակիչն անցկացվեց խաղերի կազմակերպիչ բուհի՝ Հայաստանի պետական տնտեսագիտական համալսարանի մարզադահլիճում: Այսօր վոլեյբոլի եզրափակիչ մրցախաղով ավարտված «Դասախոսական գավաթը» մեկնարկել էր հունվարի 25-ին:
ՀՊՏՀ Ֆիզդաստիարակության, արտակարգ իրավիճակների և քաղպաշտպանության ամբիոնի վարիչ, Հայաստանի ուսանողական մարզական ֆեդերացիայի նախագահ եւ խաղերի կազմակերպման երախտավոր Հովհաննես Գաբրիելյանի ձեւակերպմամբ, վոլեյբոլն, այնուամենայնիվ, մնում է «Դասախոսական գավաթի» ամենասպասված ու հեղինակավոր մարզաձեւը, չէ որ 8 տարի առաջ հենց այս մարզաձեւով են մեկնարկել Տնտեսագիտականի մեր գործընկերների նախաձեռնած գեղեցիկ, կարեւոր եւ տարեցտարի ավելի մեծ ժողովրդականություն վայելող խաղերը: Այս տարի մասնակցել են արդեն 13 բուհերի ավելի քան 250 դասախոսներ ու աշխատակիցներ:
Եզրափակիչից հետո 1-ինից 3-րդ մրցանակներ շահած դասախոս մարզիկներն իրենց մրցանակները ստացան ՀՊՏՀ ռեկտոր Դիանա Գոլոյանից, ընդ որում՝ բոլոր մարզաձեւերից, որոնք այսօր արդեն 7-ն են՝ արագ շախմատ, հրաձգություն, բադմինտոն, սեղանի թենիս, ուժային եռամարտ, պարանի ձգում եւ վոլեյբոլ: Տիկին Գալոյանը ջերմորեն շնորհավորեց մրցանակակիրներին եւ բարձր գնահատեց մասնակիցների ակտիվությունը, համախմբվածությունը:
Մեր վոլեյբոլիստներից բացի, պատվավոր 1-ին մրցանակներ ստացավ նաեւ արագ շախմատի կանանց մրցաշարում մրցակիցներին գրեթե «չնկատած» մեր Հերմինե Մխիթարյանը, եւ տղամարդկանց մրցաշարում 2-րդը ճանաչված Կարեն Չախոյանը:
Հայկ Կիրակոսյանի համոզմամբ, Ագրարայինի դասախոսները պատրաստ են նաեւ մարզական մարտահրավերների:
