Նախագծի նպատակն է ՀԲՀ-ի, ՍԳՀ-ի և ԲԲՀ-ի աջակցությամբ ՀԱԱՀ-ի Կարիերայի զարգացման և շարունակական կրթության բաժնի համար ստեղծել փափուկ հմտությունների մոդուլներ և կարիերայի խորհրդատվության գնահատում, ինչպես նաև մշակել մենագրություն կարիերայի խորհրդատվությունում փափուկ հմտությունների դերի մասին:
Փափուկ հմտությունների նոր մոդուլների դասավանդումը կբարձրացնի ՀԱԱՀ շրջանավարտների մրցունակությունը, գնահատումը կապահովի շարունակական բարելավումը, իսկ մենագրությունը կնպաստի համապատասխան գիտելիքների տարածմանը։ Նախագծի իրականացման ժամկետն է՝ 01/07/2024–31/12/2025: Ընդհանուր բյուջեն կազմում է 22,145.00 եվրո:
Ընթացիկ խնդիրներ
ՀԱԱՀ-ը միակ գյուղատնտեսական բուհն է Հայաստանում։ ՀԱԱՀ Կարիերայի զարգացման և շարունակական կրթության բաժինը ուսանողներին և շրջանավարտներին առաջարկում է խորհրդատվություն կենսագրականների և մոտիվացիոն նամակների պատրաստման վերաբերյալ, իրականացնում է նաև տարբեր հանդիպումներ և կրթական միջոցառումներ նորակառույց Փափուկ հմտությունների զարգացման կենտրոնում: Կարիերայի զարգացման և շարունակական կրթության բաժնի նպատակն է, որ հնարավորինս շատ ուսանողներ և շրջանավարտներ որակյալ աշխատանք ստանան աշխատաշուկայում: Հայաստանում գործազրկությունը ներկայումս գերազանցում է 13 %-ը։ Շատ դեպքերում հայերի մեծ մասը տեղափոխվում է արտերկիր և աշխատանք է փնտրում օտարերկրյա գործատուների մոտ: Օտարերկրյա գործատուները հաճախ առաջարկում են հեռավար աշխատանք, հատկապես՝ COVID-ի համաճարակից հետո։
Նախագծի նպատակն է նպաստել վերը նկարագրված իրավիճակի հետևանքով առաջացած 4 խնդիրների լուծմանը.
1) Բարելավել աշխատանք գտնելու ցածր հնարավորությունը: Այդ նպատակով անհրաժեշտ է հաջողության հասնել բարձր մրցակցային աշխատանքային հարցազրույցներում, այսինքն՝ հարկավոր է զարգացնել ինքնաներկայացման կարողությունը:
2) Աշխատողները չունեն բավականաչափ փորձ հեռահար աշխատանքի հետ, որն առաջարկվում է հատկապես COVID-ի համաճարակից հետո: Հեռահար աշխատանքը թույլ է տալիս առանց տեղափոխվելու աշխատել օտարերկրյա գործատուի մոտ, ինչը կարող է լուծել այն բազմաթիվ ուսանողների/շրջանավարտների խնդիրը, ովքեր ցանկանում են ապրել Հայաստանում:
3) Հետքովիդային շրջանը երիտասարդների շրջանում բերել է հոգեկան անհանգստության զգալի աճ։ Այս միտումը բավականին տարածված է և կարևոր է կանխել ծագող հոգեկան անհարմարությունները։
4) Համալսարանները հաճախ իրականացնում են կարիերայի խորհրդատվություն՝ ըստ իրենց մեթոդաբանության, որոնք ստանդարտացված չեն, հետևաբար, դժվար է համեմատել տարբեր համալսարանների և երկրների արդյունքները։ Արդյունքում՝ դանդաղում է շարունակական կատարելագործումն ու փոխադարձ համագործակցությունը:

Այս նախագծի նորարարական բնույթը V4 երկրներից կարիերայի խորհրդատվության փոխանցումն ու այն մարտահրավերների հաղթահարման նպատակադրումն է, որոնք հետկովիդային շրջանը բերել է աշխատաշուկա: Կարիերայի կենտրոնների միջազգային համագործակցությունը և կարիերայի խորհրդատվության ոլորտում առկա գիտելիքների գնահատման և տարածման միասնական շրջանակ ստեղծելու տեսլականը և փափուկ հմտությունների շեշտադրումը կարիերայի խորհրդատվությունում նորարարություն է, անսովոր և շատ անհրաժեշտ գործունեություն: ՀԱԱՀ Կարիերայի զարգացման և շարունակական կրթության բաժնի համար նախագիծը էական նորամուծություն է փափուկ հմտությունների ոլորտում առաջարկվող ծառայությունների ընդլայնման և գնահատման զարգացման գործում: ՀԱԱՀ-ի ուսանողներն ու շրջանավարտները պատրաստ կլինեն աշխատանքային հարցազրույցներ վարել ինչպես բազմազգ ընկերություններում, այնպես և տեղական աշխատաշուկայում։ Ավելին, նրանք կսովորեն ինքնակառավարում, որն անհրաժեշտ է հատկապես հեռահար աշխատանքի համար, քանի որ նրանք հաճախ բախվում են ինքնակառավարման սկզբունքների անտեղյակությանն ու չիմացությանը։
Ոչ պակաս կարևորություն ունի այն հանգամանքը, որ նրանք կսովորեն կանխել մտավոր ու հուզական հյուծվածությունը և հոգեբանական անհանգստությունը, որոնց դեպքերը զգալիորեն աճել են V4 երկրների ուսանողների շրջանում: ՀԱԱՀ-ում կարիերայի խորհրդատվությունը ձեռք կբերի համապարփակ գործիքներ և կդառնա ավելի լայն միջազգային կառույցի մաս, որը կարող է ազդել տարածաշրջանային աշխատաշուկայի վրա։