Մարտի 2-ից 3-ը Արմենիա-Մարիոթ հյուրանոցում կայացավ Կանաչ գյուղատնտեսության` Հայաստանում առաջին խորհրդաժողովը, որը մեկտեղել էր գյուղատնտեսության եւ հարակից ոլորտների մասնագետների, հետազոտող գիտնականների եւ այլ շահակիցների՝ ծանոթանալու եւ քննարկելու կանաչ գյուղատնտեսության ոլորտում հարակայուն զարգացման առկա իրավիճակը եւ ծանոթանալու կիրառական հետազոտությունների արդյունքներին։

Խորհրդաժողովի համակազմակերպիչներն էին Եւրոպական միության եւ Ավստրիական զարգացման գործակալության ֆինանսավորմամբ գործող Կանաչ գյուղատնտեսության նախաձեռնությունը Հայաստանում (EU-GAIA) եւ Հայաստանի ազգային ագրարային համալսարանը, նախագահող-համադրողը՝ Թվային գյուղատնտեսության հայկական ինստիտուտի հիմնադիր տնօրեն Վարդան Ուռուտյանը։

Ողջույնի խոսքով հանդես եկան ՀՀ էկոնոմիկայի նախարարի տեղակալ Արման Խոջոյանը, ԿԳՄՍ նախարարի տեղակալ Արաքսիա Սվաճյանը, ՀՀ-ում ԵՄ պատվիրակության համագործակցության բաժնի ղեկավարի տեղակալ Սիլյա Կասմանը, ՀՀ-ում Ավստրիայի դեսպանության տեխնիկական համագործակցության համակարգող գրասենյակի ղեկավար Կլաուս Կապերը եւ ՀԱԱՀ ռեկտորի պարտականությունները կատարող, նորընտիր ռեկտոր Հրաչյա Զաքոյանը։

Պարոն Զաքոյանը ջերմորեն ողջունեց խորհրդաժողովի մասնակիցներին 95-ամյա Ագրարային համալսարանի անունից։ Նա նշեց, որ արագ փոփոխվող աշխարհում մարդկանց կենսագործունեության համար նպաստավոր պայմաններ ստեղծելու տեսակետից հարակայունությունն ու կանաչ զարգացումը դառնում են օրվա հրամայական։ «Հենց այդ ուղղություններով իրականացվող նպատակահեն եւ կիրառական հետազոտությունները մարդկությանն ուղղորդելու են դեպի բարեկեցություն եւ շարունակական առաջընթաց», – ասաց պարոն Զաքոյանը եւ հույս հայտնեց, որ խորհրդաժողովի մասնակիցները կկարողանան ծանոթանալ ոլորտում իրականացվող հետազոտությունների արդյունքներին, գաղափարներ ու փորձ փոխանակել եւ «դառնալ ավելի կանաչ ապագա կառուցելու հաստատակամ դերակատարներ»։

Խորհրդաժողովի առաջին օրվա հիմնական զեկույցը՝ «Ինչպես հաղթահարել գյուղատնտեսության ոլորտի (ապագա) մարտահրավերները՝ որպես կենսագիտությունների համալսարան» ներկայացրեց Վայհենշտեֆան-Թրիսդորֆի կիրառական գիտությունների համալսարանի նախագահ Էրիկ Վույեն։

EU-GAIA նախագծի հայաստանյան ձեռքբերումների մասին զեկույց ներկայացրեց նախագծի ղեկավար Պասկալ Բոկերսը։

Այնուհետեւ տեղի ունեցավ կանաչ գյուղատնտեսության միջոցով հարակայուն զարգացմանը նպաստելու գործիքներին նվիրված պանելային քննարկում, որը վարում էր Վարդան Ուռուտյանը։ Քննարկման ընթացքում նշմարվեցին խելամիտ ու հասանելի լուծումներ, ինչպիսիք են՝ մարտահրավերների մասին իրազեկվածությունն ու համապատասխան ծառայությունների գործարկումը, հետազոտությունների եւ զարգացման ռազմավարության մշակումը եւ Հայաստանն այս առումով «քարտեզի վրա դնելը», կիրառական հետազոտությունների ֆինանսավորման առնվազն քառապատկումը, համալսարանական գերազանցությունը ֆերմերի հաջողությանը ծառայեցնելը, ոլորտի քաղաքականությունն ու բարեփոխումները դեպի ոչ միայն գյուղատնտեսության, այլեւ ամբողջ տնտեսության «կանաչեցումը» ուղղորդելը, կլիմայախելամիտ գյուղատնտեսությունը, կրթության ու արտադրության միջեւ կապի ամրապնդումը, նորօրյա գիտելիքը ֆերմերին հասանելի դարձնելու հրամայականը եւ այլն։

Ընդհանուր առմամբ այս գաղափարներն էլ կոնկրետ արտացոլումներ գտան երեք զուգահեռ նիստերի ժամանակ, որտեղ վեր հանվեցին հարակայուն եւ կլիմայախելամիտ գյուղատնտեսությանը, շրջանաձեւ տնտեսությանը, ռեսուրսների հարակայուն կառավարմանը եւ գիտելիքների փոխանցմանը/փոխանակմանն առնչվող հարցեր։

Խորհրդաժողովի ամբողջ ընթացքում կարմիր թելի պես անցնում էր համալսարանական կրթության, մեր երկրի պարագայում՝ Ագրարային համալսանի վճռական դերը կանաչ գյուղատնտեսության զարգացման ճանապարհին եղած մարտահրավերների հաղթահարման գործում։ Ինչպես արտահայտվեց դոկտ․ Վույեն՝ «եթե ոչ համալսարանները, ապա ով»։

Խորհրդաժողովի երկրորդ օրվա հիմնական զեկույցի թեման էր՝ «Թվային գործիքները՝ դեպի հարականուն եւ դիմակայուն գյուղատնտեսական արտադրություն տանող ճանապարհին», որով հանդես եկավ Վայհենշտեֆան-Թրիսդորֆի կիրառական գիւտությունների համալսարանի պրոֆեսոր Պատրիկ Նոակը։

Խորհրդաժողովի ավարտին կայացավ Կայուն գյուղատնտեսության հայկական հարթակի (sapa.am) շնորհանդեսը։ Այն ներկայացրեց ՀԱԱՀ Անտառագիտության եւ ագրոէկոլոգիայի ամբիոնի վարիչ Մարինե Մարկոսյանը (հարթակի մասին կտեղեկացնենք առաջիկայում)։

Խորհրդաժողովի ավարտին մասնակիցները շնորհակալություն հայտնեցին Վարդան Ուռուտյանին՝ կազմակերպչական արդյունավետ ջանքերի եւ խորհրդաժողովի աշխատանքները բարձր մակարդակով վարելու համար։

Մասնակիցների համար նախատեսված էր նաեւ դաշտային հետաքրքիր անցելություններ Կանաչ արահետ ՀԿ-ի Կանաչ ուսուցման կենտրոն եւ Զաբել Եսայան ագրոբիզնեսի կենտրոն։

Արտերկրի մեր գործընկերները խորհրդաժողովը գնահատեցին որպես հայաստանյան թվային գյուղատնտեսության մեկնարկ։