Դեկանի պաշտոնակատար՝ գ.գ.թ., դոցենտ  Արմենակ Ջալլադի Տեր-Գրիգորյան

Հայաստանի ազգային ագրարային համալսարանի հիմնարար ֆակուլտետներից է Ագրոնոմիական ֆակուլտետը, որը կազմավորվել է 1921թ. Երևանի ժողովրդական համալսարանում (ԵՊՀ): Ֆակուլտետի ստեղծման գործում մեծ ավանդ ունի նրա առաջին դեկանը՝ ճանաչված գիտնական ու մանկավարժ Պապա Բեժանի Քալանթարյանը:
1930թ. Երևանի պետական համալսարանի գյուղատնտեսական ֆակուլտետի բազայի վրա հիմնադրվում է Հայկական գյուղատնտեսական ինստիտուտը՝ այգեգործության, երկրագործության /դաշտավարական/ և անասնաբուծության ֆակուլտետներով: Առաջին երկուսը 1943թ. վերանվանվում են ագրոնոմիական և այգեպտղաբանջարաբուծական ֆակուլտետներ:
Ագրոնոմիական ֆակուլտետը տարբեր տարիների ենթարկվել է մի շարք կառուցվածքային փոփոխությունների. 1988թ. ագրոնոմիական և այգեպտղաբանջարաբուծական ֆակուլտետները միավորվում են և գործունեությունը շարունակում որպես ագրոնոմիական ֆակուլտետ:  1994-1995 ուստարում Հայկական գյուղատնտեսական և Երևանի անասնաբուծական-անասնաբուժական ինստիտուտների միավորման հետևանքով նորաստեղծ Հայկական գյուղատնտեսական ակադեմիայում կազմավորվում է ագրարային ֆակուլտետը, որին միանում են նաև (1997 թ.) տեխնոլոգիական ֆակուլտետի մասնագիտությունները: 2002-2003 ուստարում վերոնշյալ ֆակուլտետից առանձնացվում են անասնաբուծական ու տեխնոլոգիական մասնագիտությունները և ագրոնոմիական մասնագիտությունների բազայի վրա կրկին կազմավորվում է ագրոնոմիական ֆակուլտետը:  

Ֆակուլտետի կազմում ընդգրկված են հետևյալ 6 ամբիոնները`

• Այգեպտղաբուծության և բույսերի պաշտպանության
• Բուսաբուծության և բանջարաբուծության
• Ընդհանուր երկրագործության
• Անտառագիտության և ագրոէկոլգիայի 
• Ընդհանուր կենսաբանության
• Հայոց և օտար լեզուների:

Ֆակուլտետի գործունեությունը համապատասխանում է Բոլոնիայի գործընթացի շրջանակներում ուսուցման արդի մեթոդներին: Ֆակուլտետում ուսումնական կաբինետներն ու լաբորատորիաները ապահովված են անհրաժեշտ սարքավորումներով, ցուցադրական նյութերով, հերբարիումներով և համակարգչային տեխնիկայով: Ուսումնական գործընթացին զուգահեռ ֆակուլտետն իրականացնում է գիտական և ուսումնամեթոդական աշխատանքներ: Հիմնարար և կիրառական նշանակություն ունեցող կարևոր գիտական հետազոտությունների շնորհիվ գյուղատնտեսական արտադրության մեջ ներդրվել են ավելի քան 200 առաջարկություն, այդ թվում՝ գյուղատնտեսական մշակաբույսերի շուրջ 40 նոր սորտ: Ֆակուլտետն իր գործունեության ընթացքում հրատարակել է 170 դասագիրք և ուսումնական ձեռնարկ, ավելի քան 6800 գիտական հոդված, նաև բազմաթիվ արտոնագրեր և վկայագրեր:

• Զ.01.01 - Ընդհանուր երկրագործություն, հողագիտություն, հիդրոմելորացիա և ագրոքիմիա
• Զ.01.02 - Բուսաբուծություն, խաղողագործություն, պտղաբուծություն և բույսերի պաշտպանություն 

Ագրոնոմիական ֆակուլտետը ՀՀ-ում միակն է, որտեղ մասնագետներ են պատրաստում հետևյալ մասնագիտությունների գծով՝

• Ագրոնոմիա, սելեկցիա և գենետիկա
• Բույսերի պաշտպանություն
• Պաշտպանված գրունտի տեխնոլոգիա
• Ագրոէկոլոգիա
• Անտառային տնտեսություն և բնակավայրերի կանաչապատում:

Ագրոնոմիական ֆակուլտետը համագործակցում է ՄԱԿ-ի պարենի և գյուղատնտեսության համաշխահային գրասենյակի, Կովկասի տարածաշրջանի ագրոկենսաբազմազանության պահպանման հայկական գրասենյակի, Նորվեգիայի Սաէրհեիմի կենսաէկոնոմիկայի ինստիտուտի, Թրոմսոյի արկտիկական համալսարանի, Իտալիայի Դելլ Մանշ պոլիտեխնիկական համալսարանի (Անկորա), Ռուսաստանի մի շարք գյուղատնտեսական համալսարանների և գիտական կենտրոնների հետ: