Վարժարանի տնօրենի պաշտոնակատար՝ Արաքս Միշայի Հակոբյան

Հայաստանի ազգային ագրարային համալսարանի հանրակրթական ծրագրերի ուսուցման վարժարանը հիմնադրվել է 1997 թվականին: Որպես հանրակրթական ծրագրեր իրականացնող կենտրոն` նպաստում է համալսարանը մասնագիտական կողմնորոշում ունեցող քաղաքաբնակ և գյուղաբնակ աշակերտներով համալրելուն: Վարժարանի հիմնադրման օրվանից տնօրենն է ֆիզ.մաթ. գիտությունների թեկնածու, դոցենտ Ռոբերտ Սարգսյանը:
Վարժարանը ՀՀ տարբեր մարզերում ունեցել է շուրջ 60 հոսքային դասարաններ:Անցած ժամանակահատվածում վարժարանից և հոսքային դասարաններից ագրարային համալսարան է ընդունվել մոտ 2500 շրջանավարտ, որոնց մեծ մասն ուսումնառության ընթացքում ցուցաբերել է բարձր առաջադիմություն ու հետաքրքրություն ընտրած մասնագիտության նկատմամբ:
Հատկանշական է, որ նրանցից ավելի քան 20-ն այժմ գիտության թեկնածուներ են և դասավանդում են համալսարանի տարբեր ամբիոններում: Վարժարանն ավարտած շատ աշակերտներ համալսարան ընդունվելուց հետո ուսումը շարունակել են ԱՄՆ-ի Տեխասի համալսարանի Ագրոբիզնեսի հետազոտությունների և կրթական միջազգային կենտրոնում (մոտ 100 շրջանավարտ):
Վարժարանի մանկավարժները հրատա-րակել են ուսումնաօժանդակ ձեռնարկներ, որոնք ՀՀ կրթության և գիտության նախարարության կողմից երաշխավորվել են ինչպես վարժարանի, այնպես էլ հանրակրթական դպրոցների աշակերտների համար:
Մասնագիտական կողմնորոշումը կարևորագույն քայլերից մեկն է մարդու կյանքում, որի ճիշտ լուծումից է կախված ոչ միայն անհատի, այլև հասարակության ապագան, ազգի զարգացման առաջընթացն առհասարակ:

ԸՆԴՈՒՆԵԼՈՒԹՅԱՆ ԿԱՐԳԸ

Հայաստանի ազգային ագրարային համալսարանի հանրակրթական ծրագրերի ուսուցման վարժարանը սկսում է 2019-2020 ուստարվա ընդունելությունը 10-րդ, 11-րդ և 12-րդ դասարաններում՝ տնտեսագիտական, ճարտարագիտական, տեխնոլոգիական և ագրարային հոսքերով:

• ՏՆՏԵՍԱԳԻՏԱԿԱՆ («Մաթեմատիկա», «Անգլերեն», «Հայոց լեզու» առարկաների խորացված ուսուցմամբ)
• ՃԱՐՏԱՐԱԳԻՏԱԿԱՆ («Մաթեմատիկա», «Ֆիզիկա» առարկաների խորացված ուսուցմամբ)
• ՏԵԽՆՈԼՈԳԻԱԿԱՆ («Մաթեմատիկա», «Ֆիզիկա» առարկաների խորացված ուսուցմամբ)
• ԱԳՐՈՆՈՄԻԱԿԱՆ («Մաթեմատիկա», «Քիմիա» կամ «Կենսաբանություն» առարկաների խորացված ուսուցմամբ)

Վարժարանի ընդունելությանը մասնակցելու համար անհրաժեշտ է ներկայացնել հետևյալ փաստաթղթերը`

1. դիմում (լրացվում է Հայաստանի ազգային ագրարային համալսարանի ընդունող հանձնաժողովում ծնողի կամ ծնողին փոխարինող անձի կողմից),
2. 9-ամյա կրթության վկայականի բնօրինակը (մինչև վկայականի ստացումը տեղեկանք դպրոցից),
3. 2 լուսանկար (3x4 չափի),
4. ծննդյան վկայականի պատճեն,
5. տեղեկանք դիմորդի առողջության մասին սպասարկող բուժ. հիմնարկից:

Մանրամասն տեղեկությունների համար դիմել Հայաստանի ազգային ագրարային համալսարան` ընդունող հանձնաժողով:

Փաստաթղթերն ընդունվում են 2019թ.-ի հունիսի 3-ից, յուրաքանչյուր աշխատանքային օր, ժամը 9:00-17:00:

Հասցե` Տերյան 74, ՀԱԱՀ-ի 1-ին մասնաշենք, 2-րդ հարկ, 220ա սենյակ

Հեռ.` 012-58-58-28: